TIÐINDI     SOSIALURIN

Ákærdur fyri drápsroynd móti løgreglumanni

Mánakvøldið var skotbardagi í Miðvági, har ein maður skjeyt við høglbyrsu eftir løgregluni, og løgreglan svaraði aftur á sama hátt. Maðurin var í gjár fyri grundlógaravhoyr in absentia, har hann varð ákærdur fyri drápsroynd á løgreglumann



Maðurin, sum mánakvøldið varð skotin av løgregluni, varð seinnapartin í gjár til grundlógaravhoyr. Maðurin var ikki sjálvur til staðar í rættinum, tí hann var ikki førur fyri at verða fluttur av sjúkrahúsinum, og tí var bert verjin í hansara stað.

Ákærin vildi hava mannin varðhaldsfongslaðan fyri fyri drápsroynd á løgreglumann.

Ákærin greiddi frá, at maðurin hevði loyst skot av við høglbyrsu móti løgregluni, og hevði tá rakt ein løgreglumann í andlitið við tveimum høglum, og hann hevði rakt løgreglumannin í hjálmin við í minsta lagi 30 høglum.

 

Løgreglan fekk mánakvøldið kl. 18:30 boð um, at ein maður í Miðvági  hótti við at gera sjálvmorð, og samstundis fekk løgreglan boð um, at maðurin var vápnaður og hótti við at skjóta.

Løgreglan sendi fólk á staðið og avbyrgdi eitt øki rundan um bústaðin, og tey fingu eisini samband við hann.

Í hesum sambandi varð eisini ein samráðingarmaður hjá løgregluni sendur á staðið at tosa við persónin.

Løgreglan segði í tíðindaskrivi gjáramorgunin, at maðurin hevði latið fleiri skot av, og ein løgreglumaður var raktur av høglunum, men at hann fekk ikki nevnivert mein.

Løgreglan svaraði við at skjóta aftur, og úrslitið varð, at maðurin varð raktur. Hann fekk fyrstuhjálp á staðnum, og varð síðani innlagdur á Landssjúkrahúsið.

Ákærin bað um, at maðurin varð grundlógaravhoyrdur in absentia, tí maðurin liggur í respiratori á sjúkrahúsinum sum avleiðing av skotløstunum, og sostatt var ikki ráðiligt at fáa han oman í rættarsalin. Dómarin eftirlíkaði kravinum.

Ákærin kravdi eisini, at grundlógarforhoyrið skuldi halda áfram fyri afturlætnum hurðum. Verjin helt, at eitt referatforboð var frægari.

Hinvegin skuldi tað gerast av fyri afturlætnum hurðum, um hvørt talan skuldi vera um referatforboð.

Maðurin varð varðhaldsfonglsaður í fýra vikur.