TIÐINDI     SOSIALURIN

Ákærdur fyri at gera seg inn á fýra smágentur

Ein maður var týsdagin fyri Føroya rætt, har hann var ákærdur fyri at hava gjørt seg inn á fýra smágentur í tíðarskeiðnum frá 1992 til 1996



Ákæran ljóðaði á brot á grein 216 stk. 2 sambært grein 225 í revsilógini , ið er annað kynsligt samband enn samlega.

 

Talan er um fýra gentur tilsamans. Tvær teirra eru systrar, og konan hjá manninum er fastir teirra. Hon er eisini fastir at triðju gentuni, sum so er systkinabarn at hinum báðum gentunum. Fjórða gentan er guðdóttir mannin, og pápi hennara og ákærdi maðurin høvdu verið vinir, áðrenn pápin frætti um ágangin. Genturnar vóru allar millum trý og níggju ár, tá ágangurin skal hava gingið fyri seg.

 

Allar genturnar, sum eru vaksnar í dag, greiddu í rættinum frá, at av tí at tær høvdu tætt samband til mannin og konuna gjøgnum familjuna, vóru tær ofta á vitjan. Tær søgdu frá, at ágangurin gekk í høvuðsheitum fyri seg í stovuni hjá manninum og konuni, tá konan ikki var heima. Ein teirra vitnaði tó, at maðurin kundi finna upp á at nerta við hana, hóast onnur vóru til staðar, so leingi sum tey sótu aftan fyri eitt borð, har eingin sá.

 

Játtaði at hava verið ópassandi

Maðurin játtaði í rættinum, at hann hevði havt uppført seg ópassandi við eldru av systrunum. Maðurin greiddi frá, at einaferð hann var einsamallur við gentuni, hevði hon stungið hondina niður í buksurnar til undirlívið og sagt, at har luktaði. Hon vildi hava hann at vita, um tað luktaði, og hann hevði játtað. Hann hevði síðani stungið hondina niður í undirbuksirnar hjá henni og hevði sagt, at har var einki galið, og at tað luktaði, sum tað skuldi. Hetta hendi nakrar ferðir aftrat í tíðini aftaná, til maðurin at enda fýra ella fimm ferðir seinni greiddi gentuni frá, at hann vildi ikki gera tað meira, tí at vaksnir menn nerta ikki við lítlar gentur.

Ákærin vildi hava mannin at svara, hví hann ikki hevði sagt foreldrunum frá tilburðinum. Tað visti maðurin ikki og segði, at tað hevði hann ikki hugsað um.

Maðurin greiddi eisini frá, at tann eldra systirin var komin á gátt hjá honum eina ferð sum 19 ára gomul, og hann fortaldi rættinum, at tey høvdu havt eina bøtandi samrøðu. Hann vísti á, at gentan hevði givið úttrykk fyri, at hon harmaðist, at hon ongantíð hevði greitt foreldrunum frá, at tað var hon, ið hevði fingið hann at koyra hendurnar í undirbuksirnar hjá henni.

Gentan vitnaði í rættinum, og hon segði eisini, at hon hevði verið hjá manninum og vitjað sum 19 ára gomul. Sambært hennara frágreiðing var tað tó undir heilt øðrum umstøðum. Gentan gekk tá til sálarfrøðing og hevði fingið at vita, at tað kundi geva henni nakað av friði at konfrontera mannin við tí, sum hann hevði gjørt. Í vitnisfrágreiðingini segði hon, at maðurin var sjónliga ótilpass av vitjanini, og at hann bakkaði undan henni inn í eitt horn, tá hon vildi hava hann at svara fyri tað, sum var farið fram. Hon legði aftrat, at maðurin skuldi hava sagt "eg eri keddur av tí, men tær dámdi tað.

 

Familjustríð orsøk til ákærur

Ákærdi maðurin segði seg tó einki kenna til málini við hinum trimum gentunum, og at hann visti av ongum, fyrr enn hann varð meldaður í 2017. Hinvegin helt hann, at ákærurnar  kundu vera úrslit av arva- og øðrum familjustríði, ið hevði tikið seg upp millum konuna og beiggjar hennara. Maðurin vildi vera við, at beiggjarnir hjá konuni høvdu hótt við at meldað hann eina ferð, tí at ósemja hevði stungið seg upp aftur teirra millum, men at teir so høvdu sagt, at keypti maðurin jóla- og føðingardagsgávur til døtrarnar, so skuldu teir sleppa málinum.

Hann segði eisini, at hann og konan høvdu havt stóran ampa av hesum, tí at slaturin hevði gingið um hann í lokalsamfelagnum síðan 1996, og at hetta hevði tikið hart upp á hjúnabandið hjá honum.

 

Óttaðist, at hon var upp á vegin

Allar genturnar greiddu í rættinum frá, at tær vóru rættiliga illa merktar av áganginum, og at tríggjar teirra høvdu verið sjúkrameldaðar sum vaksnar av sálarligu meinini, ið tær høvdu fingið. Eldra systirin hevði eisini gingið til sálarfrøðing sum níggju ára gomul, tí at hon misti svøvnin. Eisini greiddi hon frá, at hon hevði sum smágenta lært, at tú gjørdist upp á vegin við kynsligum sambandi, og at hon tí gekk og óttaðist, at hon var vorðin upp á vegin. Hetta merkti nógv barnaárini, segði hon, tí hon gekk allatíð og helt eyga við undirlívinum og búkinum fyri at vita, um hann var voksin. Haraftrat greiddi hon frá, at hon hevði havt tað trupult við tankanum um at fáa børn sjálv, tí hon vildi ikki seta børn í verðina, tá tílík menniskju sum ákærdi maðurin eru til.

 

Slitu sambandið við ákærda

Tað var eitt sindur ógreitt, júst hvussu foreldrini at øllum gentunum tá í 1996 høvdu fingið frænir av, at alt ruggaði ikki rætt. Men sum skilst var okkurt barn í húsunum hjá guðdóttrini, ið hevði ovtalað seg framman fyri foreldrum hennara. Foreldrini høvdu síðani ringt til foreldrini at systrunum og sagt teimum frá, hvat tey høvdu illgruna um. Mamman at systrunum greiddi í rættinum frá, at hon hevði í byrjanini torført at trúgva søgunum. Um sama mundið koyrdi málið móti Marc Dutroux í Belgia, har hann varð ákærdur og síðani dømdur fyri at hava pínt og neyðtikið fimm gentur og dripið fýra teirra. Mamman segði, at miðlarnir gjørdu nógv burtur úr tí málinum í Føroyum, og at hon fekk seg ikki heilt at trúgva, at tílíkt var komið til Føroyar. Eftir at hini foreldrini høvdu sett seg í samband við hana fyri aðru ferð, tók hon kortini avgerð at spyrja døtrarnar, um nakað var farið fram í húsunum hjá ákærda manninum, og døtrarnar játtaðu.

 

Tá høvdu foreldrini at systrunum saman við pápanum at systkinabarninum valt at konfrontera ákærda mannin, og tey gjørdu honum greitt, at sambandið teirra millum varð slitið. Hóast ákærdi maðurin í rættinum greiddi frá, at hann hevði einans nortið við elstu systrina, tí hon hevði biðið hann kanna lukt úr undirlívinum, so segði hann einki við foreldrini um tað, tá tey komu at konfrontera hann. Tá hann í rættinum varð spurdur, hví hann ikki hevði gjørt tað, svaraði hann, at hann gjørdi tað fyri at verja gentuna, tí hann vildi ikki, at hon kom í trupulleikar við foreldrunum.

 

Av tí, at 23 ár eru liðin, síðan ágangurin skal hava gingið fyri seg, vildi verjin hava at vita frá gentunum, hví maðurin ikki var meldaður til løgregluna fyrr. Felags fyri allar genturnar var, at foreldrini høvdu ikki viljað meldað, tí at ein rættarsak hevði verið ov hørð fyri smágentur, og at tey vildu verja døtrarnar fyri tað.

Eldra systirin gjørdi tó greitt, at hon tók avgerð um at melda mannin, tá hon fann útav, at málið var um at fyrna.

 

Kravdi tvey ára fongsulsrevsing

Ákærin kravdi tvey ára treytaleysa fongsulsrevsing fyri brot á grein 216 stk. 2 sambært grein 224 og vísti á, at hóast talan er um tilburðir, ið eru farnir fram fyri yvir 23 árum síðani, so er lóggávan kring fyrning broyt fleiri ferðir síðani, og at málið tí ikki var at meta sum fyrnað.

Verjin helt hinvegin, at tað var ivasamt, um talan kundi vera um annað kynsligt samband enn samlega, og at málini við trimum av gentunum tí vóru longu fyrnað.

Ein týðandi partur av hesum var, um maðurin hevði havt fingrarnar inni í gentunum, ella um hann bert hevði følt upp á tær uttaná, tí hetta kann vera avgerandi fyri, um talan er um annað seksuelt samband enn samlegu við barn undir 12 ár ella blúnisbrot (blufærdighedskrænkelse).

Av tí, at verandi lóggáva ásetur, at fyrning verður sett eftir revsikarmunum - tað vil siga, tess harðari revsing, tess longri til málið er fyrnað - var júst hetta týðandi fyri málið, tí blúnisbrot hevur linari revsing enn annað seksuelt samband enn samlegu við barn undir 12 ár. Verjin helt eisini, at ákærin kundi ikki strekkja verandi fyrningarlóggávu yvir hendingar, ið vóru farnar fram fyri 23 árum síðani undir aðrari lóggávu. Verjin bað um frídøming til ákærda mannin.

 

Dómur verður sagdur í málinum í komandi viku.