TIÐINDI     SOSIALURIN

FNU: Náttúran verður gloymd

Tað gongur framá í ferðavinnuni, men vit mugu steðga á og tryggja náttúru- og umhvørvisviðurskiftini, áðrenn vit seta meira vøkstur á ferðavinnuna. Umframt vaksandi útlát frá flogferðslu hevur ferðavinnan eisini onnur árin á náttúruna



- Talið á flogferðum er farið upp, og tað er ógvuliga óheppið, tá hetta ger, at vit fáa eitt hægri útlát av veðurlagsgassum.

Tað sigur Theresa Jákupsdóttir, sum er talskvinna fyri Føroya Náttúru- og Umhvørvisverndarfelag, FNU.

- Men tað kemur ikki óvart á okkum, tí frá politiskari síðu hevur mann stuðlað uppundir at selja Føroyar sum ferðafólkaland, og mann hevur økt játtanina til Visit Faroe Islands. Samstundis verður útlátið frá flogferðum ikki talt við í føroysku uppgerðina av útláti av veðurlagsgassum, tí flogførini bunkra fyri tað mesta uttanlands.

FNU metir, at ein grundleggjandi fortreyt fyri at bøta um viðurskiftini er, at hetta verður talt við í føroyskum hagtalshøpi. Theresa Jákupsdóttir vísir eisini á, at í løtuni eru flogferðaseðlar frítiknir MVG, og tað í grundini er at rokna sum ein stuðul til flogferðslu. Samstundis er einki CO2 avgjald á flogferðaseðlum, og tað rætta hevði verið, at bæði MVG og CO2 avgjøld vórðu løgd á flogferðaseðlarnar.

FNU ynskir ikki, at tað skal ganga út yvir tey, ið hava minst at liva fyri, og vísir tí á, at tílík avgjøld kunnu saktans skipast á ein sosialt rættvísan hátt.

- Aðrastaðni verður tosað um, at jú meira tú flýgur, tess hægri verða avgjøldini, soleiðis at tú ikki rakar tey, sum kanska ikki ferðast so ofta. Samstundis hava vit fingið fleiri nýggjar rutur - Barcelona, París, og nú kemur New York í næstum. Hesar longu ruturnar hava við sær, at fólk ferðast oftari hvørt ár, og eitt eyka avgjald kundi verðið lagt á tær, sigur Theresa Jákupsdóttir.

 

Náttúrverndarøkið verður gloymt

Ásannast má, at tað hevur eydnast Visit Faroe Islands rættiliga væl at lýsa og skapa uppmerksemi um Føroyar sum ferðavinnumál. FNU heldur tó, at Visit Faroe Islands hevur tikið ov lítið av ábyrgd av umhvørvi og náttúru her heima.

- Tað, sum tey gera, er at vísa eina sminkaða og romantiska mynd av fjøllum, havi og haga, og harvið krógva tey tað stóra trýstið, sum er á náttúruna.

Ein ferðavinna kundi givið teimum ymisku økjunum í landinum eina rødd og verið við til at vart náttúruna, men ístaðin er ferðavinnan í løtuni miðstýrd og tykist líkasæl við tey inntriv, ið verða gjørd við náttúruna, sigur Theresa Jákupsdóttir. Tað er kanska serliga bóndurnir, ið merkja sviðjan av øktu ferðavinnuni, og samstundis vita vit lítið um avleiðingarnar, ið vaksandi ferðafólkatalið hevur á ríka fuglalívið í Føroyum.

- Vit halda, at ferðavinnan kundi verið meira proaktiv í at stuðla lokalum kreftum í at verja náttúruna og umhvørvið. Tað gera tey so ikki, at tað er næstan verðið so, at hvørja ferð, at tú sært eina mynd av onkrum, sum er úti í náttúruni, so verður tú mintur á kampanjuna hjá Visit Faroe Islands, og at Føroyar eru vorðnar ein søluvøra.

 

Closed for Maintainance

Theresa Jákupsdóttir vísir eisini til seinasta átakið hjá Visit Faroe Islands, har útlendingar kundu skriva seg upp og keypa sær ein ferðaseðil fyri at koma til Føroyar at gera ábøtingararbeiði við fríum kost og logi.

- Tey smekkaðu onkrar pelar eftir onkrum hagagøtum, men restin var bara ein lýsingarkampanja. Her halda vit altso, at arbeiðið hjá Visit Faroe Islands við burðardygd er rættiliga grunt, og arbeiðið fyri at verja náttúruna er ikki til, sigur Theresa Jákupsdóttir, sum heldur, at tað átakið var betri ógjørt.

 

FNU metir ikki, at tað er ráðiligt at økja um ferðavinnuvirksemið í Føroyum í løtuni, og neyðugt er við náttúrumargfeldislóg, áðrenn ferðavinnan skal gerast ein størri partur av føroyska samfelagnum.

- Vit skulu hava eina nógv sterkari nátturuvernd. Og Visit Faroe Islands livir av sølu, men tað er ikki Visit Faroe Islands, sum skal verja náttúruna í Føroyum. Tað gera tey heldur ikki, men tey branda seg upp á tað.