TIÐINDI     SOSIALURIN

Gongdin í Suðuroy er nokk so ræðandi

ELDRAØKIÐ Í SUÐUROY Tað er eingin lætt loysn, og sum tað sær út, fer støðan bara at versna



– Soleiðis sum eg síggi upp á tað, hava vit næstan eina skyldu til at brúka teir pengarnar, sum tað er neyðugt at brúka.

Tað sigur Dennis Holm, borgarstjóri í Vági, og formaður í Suðuroyar Bú- og Heimatænastu, sum umsitur eldraøkið í oynni.

Sum vit skriva í aðrari grein hava kommunurnar í Suðuroy stórar trupulleikar við at fíggja eldraøkið, tí endurgjaldið úr landskassanum er yvir fýra milliónir minni enn eldraøkið í oynni fer at kosta næsta ár.

Sum tað eisini sæst, er tað stórur munur á, hvussu hart kommunurnar verða raktar og Dennis Holm sigur, at hjá summum kommunum er støðan rættiliga ring.

Men hann vísir á, at eldraøkið er eitt økið, sum hevur beinleiðis ávirkan á viðurskiftini hjá borgarunum, og tí er tað hansara hugburður, at tað verður neyðugt at fíggja tað, sum krevst fyri at varðveita eina nøktandi tænastu.

– Í mínum hugaheimi hava vit ikki aðrar møguleikar enn at rinda tað, eldraøkið kostar, leggur hann afturat.

Hann vísir á, at nógv tann størsti parturin av útreiðslunum til eldraøki, eru lønir, so verða sparingar settar í verk, slepst heldur ikki undan at niðurleggja onkra tænastur til tey eldru, og hann sigur, at eftir hansara tykki er tað veruleikafjart at hugsa um tað.

 

 

Ein stórur trupulleiki

Dennis Holm sigur, at í sambandi við eldraøkið, hevur Suðuroyggin serliga ein stóran trupulleika, og tað er, at talið á eldri fólkum økist skjótt - og tað økist nógv skjótari enn talið á fólki í arbeiðsførum aldri.

Í 2011 vóru tað 14,8 prosent, av suðuroyingum, sum vóru yvir 67 ár, men í ár er tað talið á pensjónisgur komið upp á 20,1 prosent.

Tað merkir, at samstundis sum at fólkatalið í Suðuroy er minkað, er talið á eldri vaksið 15 prosent og sostatt er aldurssamansetingin illa skeiklað.

– Sostatt hevur Suðuroyggin havt ein vøkstur í talinum á pensjónistum, sum er heilt merkisverdur, og í roynd og veru er hendan gongdin ræðandi, sigur Dennis Holm.

Hann sigur, at hetta er ein gongd, sum hevur elvir til tann heilt stóra trupulleikan í Suðuroynni, sigur Dennis Holm.

Hann vísir á, at sum gongdin er nú, fer støðan alsamt at versna. Í løtuni verða einar 50 milliónir goldnar í lønum í eldraøkinum í Suðuroy, men nú eru lønarsamráðingar, og lønirnar hækka tvey ella trý prosent hvørt.

– So bara av hesi orsøk verður eldraøkið í Suðuroy eina millión dýrari á hvørjum ári, ella meiri enn tað, sigur formaðurin í Bú- og Heimatænastuni í Suðuroy.