TIÐINDI     SOSIALURIN

Kend andlit skulu mynda Kringvarpið

Kringvarpið hevur seinastu vikurnar sett tveir royndar journalistar í starv, aftaná at fleiri av verandi journalistum eru farnir aðrar leiðir. Næstu seks mánaðirnar verða Barbara Holm, fyrrverandi blaðstjóri í Sosialinum, og John Johannesen, fyrrverandi løgtingslimur og landsstýrismaður fyri Javnaðarflokkin, partur av journalistiska umhvørvinum í Sortudíki



Fólk sum fylgja væl við tíðindunum í Kringvarpinum hava uttan iva lagt merki til, at nógvar broytingar hava verið í manningini tey seinnu árini.

Seinastu tíðina hava kend nøvn sum Óluva Zachariasen, Beinta Løwe, Rógvi Olavson, Leivur Frederiksen, Uni Holm Johannesen og Jan Lamhauge antin søkt farloyvi úr størvunum ella eru farin í onnur størv, samstundis sum innanhýsis broytingar í Kringvarpinum hava ført við sær, at kendir sjónvarpsvertir sum Johnsigurd Johannesen, Bogi Godtfred og Sigrún Brend framyvir ikki verða at síggja sum vertir í Dag&Viku, men fara at takast við aðrar uppgávur í húsinum.

Meðan fleiri royndir journalistar sostatt eru givnir ella hava tikið ein fyribils steðg frá arbeiðinum í Kringvarpinum, hevur tað í staðin eydnast leiðsluni at fingið fatur á nøkrum av teimum meira kendu og royndu nøvnunum í føroyska fjølmiðlaheiminum.

Ein teirra er sjálvur tíðindaleiðarin George L. Petersen, ið byrjaði í starvi í Kringvarpinum í januar í ár, og stutt eftir tók við sessinum sum tíðindaleiðari. Umframt at hava drúgvar royndir frá fleiri føroyskum miðlum sum journalistur, kom George L. Petersen í Kringvarpið úr einum starvi sum ábyrgdarblaðstjóri í Dimmalætting. Tíðindaleiðarastarvið í Kringvarpinum er heldur ikki ókent fyri George L. Petersen, tá tað telist millum størvini, ið hann áður hevur røkt.

Í farnu viku byrjaði ein annar gamal kringvarpsjournalistur aftur í Kringvarpinum, tá John Johannesen, fyrrverandi landsstýrismaður og tingmaður fyri Javnaðarflokkin og fyrrverandi journalistur í Sosialinum og Kringvarpinum, aftur var at hoyra í útvarpstólum kring landið. Umframt eina fortíð í politikki og miðlunum, hevur John Johannesen seinastu árini arbeitt hjá Ríkisumboðnum og javnan verið brúktur sum politiskur eygleiðari í ymiskum miðlum.

##med2##

Og í dag byrjar Barbara Holm, ið var blaðstjóri í Sosialinum fram til 1. februar, í starvi sum tíðindafólk í Kringvarpinum. Umframt at hava starvast í Miðlahúsinum, har hon hevur framleitt tilfar til bløð, heimasíður og loftbornu miðlar, hevur Barbara Holm eisini starvast sum kampanjuleiðari hjá Tjóðveldi til tvey løgtingsval.

Sostatt er talan um trý roynd fólk í føroyska fjølmiðlaheiminum, ið nú eru við til at lyfta arvin eftir teimum, ið eru givin seinastu tíðina.

- Vit royna at hava eina blanding av royndum og nýggjum journalistum í Kringvarpinum. Fyrimunurin við royndum journalistum sum John Johannesen og Barbaru Holm er, at tey kenna tað journalista yrki og tí er tað skjótari at fáa tey í gongd við framleiðsluna av tilfari, sigur tíðindaleiðarin í Kringvarpinum, ið eisini upplýsir, at í báðum førum er talan um eina fyribilssetan upp á seks mánaðir.

Fortíðin eingin trupulleiki
Tað hevur kortini vakt ans, at John Johannesen, sum í fleiri ár var ein partur av politisku skipanini, nú verður ein partur av toyminum av journalistum í Kringvarpinum, ið skal viðgera politisk viðurskifti.

Tann kritikkurin kann væl hugsast at kykna aftur við starvssetanini av Barbaru Holm, sum var kampanjuleiðari hjá Tjóðveldi til løgtingsvalið. Harumframt hava bæði George L. Petersen og Sólvit E. Nolsøe, vertur í Dag&Viku, eina fortíð sum valevnir fyri ávikavist Sambandsflokkin og Fólkaflokkin.

Fortíðin hjá nýggju journalistunum vekir kortini ikki høvuðbrýggj hjá tíðindaleiðaranum, ið metir at tað ikki kann haldast móti teimum.

- Tað eru fleiri ár síðan, at John Johannesen var aktivur í politikkur og hevur hann heldur ikki verið limur í Javnaðarflokkinum í fleiri ár. So har dugi eg ikki at síggja nakran trupulleika, sigur hann og heldur fram.

- Barbara Holm var kampanjuleiðari hjá Tjóðveldi, men har má eg bara siga, at tað er eitt professionelt arbeiði at líkna við at vera taluskrivari hjá einum landsstýrismanni. Slíkt eigur ikki at avmarka starvsmøguleikar frameftir.

Harumframt setur hann sítt álit á, at bæði nýggju starvsfólkini, men eisini restin av starvsfólkahópinum, brúka sítt sunna skil í arbeiðinum.

- Tað kann sjálvandi vera eitt sindur trupult, men hetta eru professionel fólk. So vit brúka okkara sunna skil og eru varin við hvørjar søgur ymisk fólk gera. Øll her hava eina professionellan hugburð, og vita tey ikki skulu ikki renna ørindi fyri nakran politiskan flokk, meðan tey eru her, sigur George L. Petersen.

Nýtt Dag & Vika
Tað eru ikki bara starvsfólkahópurin, ið verður endurnýggjaður í hesum døgum, men verður sjálvt flaggskipið hjá Kringvarpinum, tíðindasendingin Dag & Vika í sjónvarpinum, dagførd. Og eftir ætlan fer nýggja Dag&Vika av bakkastokki ein av komandi døgunum.

- Okkara nýggja studio er um at vera klárt og mangla tað einans nøkur smá tøknilig viðurskifti. Men annars eru fysisku karmarnir upp á pláss og vóna vit at taka tað í brúk í hesi vikuni, sigur George L. Petersen, tíðindaleiðari í Kringvarpinum.

Tað var 5. september, at Sosialurin kundi bera tíðindini, at umfatandi broytingar blivu gjørdar í Dag&Viku, ið millum annað merkti, at Sigrún Brend, Bogi Godtfred og Johnsigurd Johannesen blivu skift út við aðrar vertir.

Tá segði George L. Petersen, at tað verða Sólvit E. Nolsøe, Elin Mirjamsdóttir, Heini Gaard og Kára Bjarnadóttir Jakobsen, ið verða vertir í Dag&Viku.

Síðan er tann broyting hend, at Kára Bjarnadóttir Jakobsen hevur fingið bjóða starv í Uttanríkis- og Mentamálaráðnum og verður sostatt ikki partur av toyminum av vertum í Dag&Viku. Í staðin tekur Jón Brian Hvidtfeldt við tí leiklutinum.

Jón Brian Hvidtfeldt er eisini partur av redaktiónstoyminum í nýggju aktualitetssendingini hjá útvarpinum, Breddin, ið verður send seinnapartar.

Umframt hann eru Brynhild Thomsen og Marjun Dalsgarð partur av redaktiónini, meðan John Johannesen er knýttur at sendingini sum journalistur. 

Mynd: kvf.fo