TIÐINDI     SOSIALURIN

Menn renna undan kvinnum

Munurin millum menn og kvinnur, tá tað kemur til tal á løntakarum og upphædd á lønargjaldingum, er vaksin seinastu fimm árini

1000 fleiri menn enn kvinnur eru løntakarar, og menn forvunnu í mai mánaði 200 milliónir krónur meira enn kvinnur



Føroyski búskapurin hevur tað so gott sum sjáldan. Avgerandi búskapartøl peika støðugt rætta vegin. Talið á  løntakarum er í toppi og veksur støðugt. Milliónirnar, sum verða goldnar í løn, eru so nógvar sum ongantíð og vaksa støðugt í tali. Arbeiðsloysið er í botni.
Nýggjar uppgerðir hjá Hagstovu Føroya vísa, at framgongdini í løntakaratalinum og lønargjaldinum heldur fram. Seinastu fimm árini hevur vøksturin verið støðugur, og ongar ábendingar eru um, at gongdin fer at broytast munandi komandi tíðina.
Í mai mánaði vórðu goldnar umleið 830 milliónir krónur í lønum. Tað eru umleið 20 milliónir meira enn sama mánað í fjør. Fyri umleið fimm árum síðani fóru lønargjaldingarnar um 600 milliónir krónur, og vøksturin hevur verið støðugur síðani.
Í mars mánaði vóru 27.200 løntakarar í Føroyum. Tað eru umleið 800 fleiri løntakarar samanborið við sama mánað í fjør. Seinastu fimm árini eru støðugt fleiri fólk løgd afturat løntakaraskaranum.

Menninir økja um munin
Bæði tá ið tað kemur til tal á løntakarum og upphædd í lønargjaldingum hevur gongdini hesi seinastu fimm árini verið, at munurin millum menn og kvinnur veksur støðugt.
Í mars mánaði vóru ummleið 14.100 menn í løntakaraskaranum. Talið á kvinnum var 13.100. Harvið vóru umleið 1000 fleiri menn enn kvinnur millum løntakararnar. Sambært Hagstovu Føroya var munurin millum menn og kvinnur fyri góðum fimm árum síðani bert 500 fólk.
Eisini tá ið tað kemur til lønargjaldingarnar veksur munurin millum menn og kvinnur.
Í mai mánaði forvunnu menn góðar 510 milliónir krónur, meðan kvinnurnar forvunnu umleið 320 milliónir krónur. Munurin er næstan 200 milliónir krónur, sum menn fáa meira í løn enn kvinnur. Hagstova Føroya staðfestir, at í 2014 – fyri umleið fimm árum síðani ­– var munurin millum menn og kvinnur slakar 140 milliónir krónur.
Tí staðfestir Hagstova Føroya í sínum uppgerðum, at bæði tá ið tað kemur til tal á løntakarum og upphædd í lønargjaldinum renna menn undan kvinnum.

Milliónir í tænastu
Almennu og privatu tænastuvinnurnar standa fyri týðandi parti av búskapinum.
Næstan 65 prosent av lønargjaldingunum vóru gjørd í almennu og privatu tænstuvinnunum. Tað almenna er størsti einstaki vinnubólkur. Byggivinnan stendur fyri 15 prosentum, og fiski- og tilfeingisvinnan stendur fyri 20 prosentum.
Í mars mánaði fingu 9.694 fólk løn frá tí almenna. 8.807 fólk fingu løn í privatu tænastuvinnuni. Umleið 4.300 fingu løn í ávikavist byggivinnuni og fiskivinnuni. Umleið 70 prosent av løntakarunum eru í almennu og privatu tænastuvinnunum.

1000 fleiri menn enn kvinnur eru løntakarar, og menn forvunnu í mai mánaði 200 milliónir krónur meira enn kvinnur