TIÐINDI     SOSIALURIN

Skulu føla seg trygg at ringja til 112

- Vit kundu handfarið uppringingina til 112 betri, og slíkt læra vit altíð av. Tá slíkar støður sum tann í síðstu viku henda, hyggja vit altíð eftir okkum sjálvum og spyrja, um tað er nakað, ið vit kundu gjørt betri. Tað sigur Steen Nørskov, sjefpolitiinspektørur í løgregluni, til søgurnar, ið hava staðið í Vikuskiftis-Sosialinum og Sosialinum mánadagin, um fólk, ið føla tey ikki verða tikin í álvara, tá tey ringja til 112 um full fólk



Løgreglan tekur nú í egnan barm og er farin undir at eftirmeta tvær støður í síðstu viku, tá fólk ringdu í samband við fullar menn, ið tey mettu høvdu tørv á hjálp.

Í Vikuskiftis-Sosialinum bar til at lesa um eina hending í miðbýnum í Havn mikudagin, tá ein maður, ið var rýmdur av Landssjúkrahúsinum, sat avdottin í regninum. Og hóast fleiri borgarar boðaðu løgregluni og sjúkraflutningstænastuni frá støðuni, sat maðurin í regninum í tríggjar tímar, áðrenn hann fekk nakra hjálp.

Í Sosialinum mánadagin bar eisini til at lesa um eina støðu í Vatnsoyrum fríggjadagin, tá ein fullur maður lá á vegjaðaranum. Ein kvinna, sum kom fram á mannin, greiddi frá hvussu hon ringdi til 112, men bleiv skelkað av atburðinum hjá vakthavandi á alarmsentralinum, ið ikki tóktist at vilja taka støðuna í álvara.

Eftirmeta støðurnar
Steen Nørskov, sjefpolitiinspektørur í løgregluni í Føroyum, vissar um, at løgreglan tekur øll slík mál í álvara og ásannar, at serliga tilburðurin fríggjadagin kundi blivið handfarið betri.

- Vit kundu handfarið uppringingina til 112 betri, og slíkt læra vit altíð av. Tá slíkar støður sum tann í síðstu viku henda, hyggja vit altíð eftir okkum sjálvum og spyrja, um tað er nakað, ið vit kundu gjørt betri, sigur hann.

Tað er serliga hendingin í Vatnsoyrum, ið sjefpolitiinspektørurin harmast um, men vísir á, at tey hava verið í samband við kvinnuna.

- Í samband við tilburðin um vikuskiftið hava vit vent okkum til persónin, ið ringdi til 112, fyri at greiða frá, at handfaringin var skeiv. Hon hevði gjørt alt rætt. Hon metti, at talan var um eina akutta støðu og ringdi tí 112. Tað skal hon eisini gera í slíkari støðu, og tá verður tað vit, ið hyggja professionelt á støðuni og skulu loysa hana út frá tí.

Hann vísir kortini á, at hann kennir ikki løgregluna aftur í yvirskriftini, at tey ikki ynskja at hjálpa fullum monnum, tá tað er í heilum, at løgreglan júst hjálpir teimum, ið eru komin illa fyri.

- Men tá tað er sagt, so gera hesar báðar hendingar tað, at vit hyggja eftir, um tað er nakað, ið vit kunnu gera betri í løgregluni og í samstarvinum við aðrar myndugleikar, sigur Steen Nørskov.

Tryggleiki
Sjefpolitiinspektørurin leggur dent á, at tað skal vera soleiðis, at borgarar sita eftir við einari kenslu av tryggleika, tá tey venda sær til løgregluna í samband við eitt akutt mál.

- Spurningurin er so, um tað er nakað vit kunnu gera betri, so at tann borgarin, ið vendir sær til okkara, fær tann tryggleikan, ið tey eftirlýsa. Tað er eitt mál hjá okkum, sigur hann og leggur afturat.

- Vit megna ikki at loysa trupulleikan við fullum fólkum, tí einki forboð er fyri slíkum, men eg havi eitt heilt klárt mál um, at vit skulu kunnu veita eina slíka tænastu fyri borgarum, so at tey føla seg trygg, tá tey venda sær til løgregluna.

Í greinunum í Sosialinum mánadagin greiddu ymisk fólk frá, at tey mettu seg ikki verða tikin í álvara, tá ið ringt verður um full fólk. Og so skal ikki vera, sigur sjefpolitiinspektørurin.

- Tað vil eg undirstrika, at tað er okkara mál, at óansæð hvat talan er um, so skulu fólk føla, at vit taka tey í álvara, tá tey venda sær til okkara, sigur Steen Nørskov.

Munur á 112 og 351448

Steen Nørskov vísir á, at tað er ein munur á nær fólk skulu ringja til 112 ella 351448. Hóast bæði eru til løgregluna, er annað einans til akuttar støður.

- Um man stendur í einari akuttari støðu, so skal man brúka 112. Tað er til eina støðu, tá man hevur brúk fyri hjálp her og nú. Allar aðrar fráboðanir til løgregluna skulu til 351448, vísir hann á.

Og í ítøkiligu dømunum frá farnu viku metir hann, at tað fyrra var ein støða til 351448, meðan tað seinna var ein støða til 112.

- Fyri viðkomandi, sum sat í miðbýnum, hevði tað verið meira natúrligt at ringt til 351448, men í hinari støðuni er tað heilt natúrligt, at man metir, at tað er so akutt, at man ringir til 112. Tað hava vit eisini sagt við hana. Men man skal ikki ringja til 112 uttan talan er um eitt akutt mál, tí tað er ikki eitt vanligt telefonnummar, ið man skal brúka, sigur Steen Nørskov.