TIÐINDI     SOSIALURIN

Sosialir miðlar skaða ikki ungfólk

Nýggj norðurlendsk frágreiðing heldur, at ungfólk, sum trívast í lívinum, trívast eisini á sosialum miðlum



Nýggj norðurlendsk frágreiðing, sum varð kunngjørd í gjár, heldur, at eingi prógv eru fyri, at sosialir miðlar eru skaðiligir fyri ungfólk – nakað sum annars hoyrist aftur og aftur millum fólk.

– Ungfólk, sum trívast í lívinum, trívast eisini á sosialum miðlum. Bæði granskarar og miðlar hava lyndi til at leggja øll saman í eitt, og tað er soleiðis, at mýtur verða skaptar, skriva granskararnir í frágreiðingini.
Frágreiðingin, sum hevur heitið »#StyrPåSoMe – Er sociale medier faktisk en trussel for unges trivsel?« staðfestir enn einaferð, at norðurlendskir ungdómar eru stórbrúkarar av sosialum miðlum. Granskararnir á The Happiness Resarch Institute hava eftir umbøn frá Norðurlandaráðnum hugt eftir, um samband er millum brúk av sosialum miðlum og sálarheilsu.

Sosialt lív
Høvuðsniðurstøðan í frágreiðingini er, at sosialir miðlar eru í sær sjálvum ikki avgerandi fyri, hvussu ungfólk trívast. Hendan niðurstøða verður undirbygd av, at brúkið hjá ungfólki av sosialum miðlum er ein spegil av teirra lívi og trivnaði annars. Granskararnir halda seg kunna staðfesta, at ungfólk, sum trívast í lívinum, trívast eisini á sosialum miðlum.
– Tá ið tað kemur til ungfólk, kunnu teirra sosiala lív og teirra lív á sosialum miðlum ikki skiljast at. Hesi hanga óloysiliga saman, sigur Laura Sillanpää, sosiologur, við Norden.org.
Granskararnir halda, at heldur enn at geva sosialu miðlunum skyldina fyri mistrivnað hjá ungum, eigur sjóneykan heldur at verða sett á teir trupulleikar, sum ungu hava við einsemi og manglandi stuðul frá foreldrum. Tað er hetta, sum sæst aftur í brúkinum av sosialum miðlum, stendur at lesa í frágreiðingini.

Myndatekstur:
Sosialir miðlar eru í sær sjálvum ikki avgerandi fyri, hvussu ungfólk trívast, siga granskarar