TIÐINDI     SOSIALURIN

Visit Faroe Islands eru alt ov ágangandi í marknaðarføringini

– Visit Faroe Islands eru alt ov ágangandi at marknaðarføra føroysku náttúruna næstan sum eitt sjálvtøkuborð. Nú eingi útlendsk ferðafólk koma til landið í ár, mugu Visit Faroe Islands og Jarðir gera semju um, hvussu ferðavinnan í føroysku náttúruni skal vera í framtíðini, sigur Pól Sundskarð

Pól Sundskarð á einum av mongum fjallatoppunum í landinum



Ídnasti føroyingurin at ganga í føroysku náttúruni seinastu 15 árini, Pól Sundskarð, tekur nú blaðið frá munninum.

– Eg eftirlýsi samstarvsvilja frá Visit Faroe Islands til festarar og ognarar av høgum kring landið. Nú hava jarðareigararnir skipað seg í felagið Jarðir. Tí er tvingandi neyðugt hjá Visit Faroe Islands og Jarðum at gera semju um framtíðar ferðavinnu – og tað er eitt gylt høvi at gera tað nú, tá ið eingi ferðafólk koma til landið, sigur Pól Sundskarð.

Í fríum falli

Sjálvur hevur Pól Sundskarð gingið sera nógv í føroysku náttúruni seinastu 15 árini. Hann hevur verið á øllum teimum 340 fjallatoppunum í landinum – enntá fleiri ferðir – og hann hevur gingið og runnið eitt ótal av túrum í føroysku náttúruni bæði einsamallur og saman við øðrum. Seinnu árini hevur hann satsa alt upp á ferðavinnuna, har hann bjóðar seg fram sum ferðaleiðara fyri útlendingum, ið vilja ganga í føroysku fjøllunum.

Men nú er virksemi í ferðavinnuni fullkomiliga steðgað upp.

– Eg eri í fríum falli. Men eg havi gott mót. Tær íløgurnar, ið eg havi gjørt, havi eg rindað so hvørt. Tað sær ikki út til at koma nakað av ferðafólki í ár, men eg síggi jaligt upp á støðuna. Tað ræður um at fyrireika seg til komandi ár, sigur hann. 

Skeiv marknaðarføring

Hann heldur, at avmarkingar mugu gerast í ferðavinnuni.

– Tað ber ikki til við hópferðavinnu í føroysku fjøllunum, sum vit hava sæð tað síðstu árini. Í fjør var heilt út av lagi, og tá vóru um 125.000 ferðafólk í landinum. Ferðafólkini gingu allastaðni – eisini har vanligi føroyingurin ikki gongur. Hvussu verður um fimm ár, tá ið kanska 500.000 ferðafólk koma higar. Føroyar eru ikki eitt alibrúk. Ferðavinnan í føroysku náttúruni má skipast, og tað er avmarkað, hvussu nógv hon tolir. Tí mugu avmarkingar setast, sigur Pól Sundskarð.

Hann undirstrikar tó, at hann einki hevur ímóti, at nógv verður gjørt fyri at fáa útlendingar til Føroya. Tað er bara náttúran, ið ansast má eftir.

– Tað er gott, at nógv verður gjørt fyri at fáa ferðafólk til Føroya, at hotellini verða fylt, og at ráðstevnur og tiltøk eru av ymiskum skal. Eg hugsi bara um náttúruna. Tað, sum mær ikki dámar, er, at Visit Faroe Islands marknaðarførir Føroyar sum eitt land, har øll ferðafólk eru vælkomin at ganga allastaðni uttan nakra avmarking. Lat okkum bara fáa nógv ferðafólk til landið, men so mugu vit eisini hava onnur tilboð enn gongd í haga. Hvat við tilboðum á sjónum, mentanartilboð ella okkurt heilt annað. Tað er avmarkað, hvussu nógv náttúran tolir, sigur hann.

##med2##

Náttúran ikki egnað til hópferðavinnu

Hann vísir á, at neyðugt er við burðardygd í føroyskum náttúruni.

– Eg segði í sjónvarpinum í januar í fjør, at neyðugt er við timeout. Tá hugsaði eg einans um náttúruna. Føroyska náttúran er ikki egnað til hópferðavinnu. Vit skulu heldur hava kvalitet enn kvantitet. Nú fáa vit eitt timeout – lat okkum brúka tað til at skipa ferðavinnuna í føroysku náttúruni, sigur hann.

Hann vísir á, at nøkur av best umtóktu ferðavinnustøðunum í Føroyum eru í serligum vanda, at náttúran verður álvarsliga skadd.

– Tað eru eini 10 til 15 støð, sum eru serliga útsett. Millum onnur Enniberg, Kallurin, Eiðiskollur, Gjógv, Tjørnuvík, Saksun, Kirkjubøur, Slættarartindur, Trælanípan, Mykines og Hvannhagi. Hagin er illa slitin á fleiri av hesum støðunum, fuglalívið er hótt og seyðurin fer burtur av hesum plássum. Náttúran skal vera burðardygg, og okkara eftirkomarar skulu eisini sleppa at njóta hana. Tað er ein sólskinssøga, at ferðir út í Drangarnar í Vágum bara verða gjørdir tríggjar ferðir um vikuna og við ferðaleiðara. Tað verjir náttúruna, sigur Pól Sundskarð.

 

Krav um ferðaleiðara

Hann heldur eisini, at tað skal vera eitt krav, at útlendingar sleppa ikki út í náttúruna uttan ferðaleiðara, og at tað má stýrast við harðari hond.

– Ferðafólk skulu ikki fáa at vita, tá ið tey koma til Føroya, at neyðugt er at hava ferðaleiðara við sær, um tey ætla onkran túr í hagan. Tað skulu tey longu fáa at vita, tá ið Visit Faroe Islands marknaðarførir Føroyar úti í heimi. Her hevur Visit Faroe Islands verið alt ov ágangandi í marknaðarføringini, sigur hann.

Hann vísir eisini á, at hátturin, sum Visit Faroe Islands hevur marknaðarført føroysku náttúruna, ger, at vandi er fyri, at útlendskir agentar avrita og selja sínar egnu ferðir til útlendsk ferðafólk og taka pening fyri tað, uttan at føroysku festararnir og jarðareigararnir fáa nakað burturúr.

– Lat Jarðir heldur fáa tann partin, sigur hann.

Viðvíkjandi kravinum um ferðaleiðara viðgongur hann, at tað kann vera eitt sindur nógv.

– Eg veit, at kravið um ferðaleiðara er eitt sindur ‘overkill’, men tað er neyðugt at senda greið signal út til ferðafólkið. Onkrar lættari túrar kundu ferðafólkið tó møguliga sjálvi gingið, sigur hann.

Nú ert tú sjálvur ferðaleiðari, og tað er títt livibreyð. Er tað ikki tí, at tú vilt seta krav um, at ferðaleiðari skal vera við?

– Eg eri so lítil partur av tí samlaða partinum av ferðaleiðarum. Tað er tørvur á nógvum ferðaleiðarum. Eg ynski meira, at ognarar og festarar fáa eitt annað bein at standa á, at teir eisini kunnu sleppa at vera ferðaleiðarar, sigur Pól Sundskarð.


Vandamikið í føroysku náttúruni

Hann vísir á, at tað er vandamikið at ganga í føroyskum náttúruni, og tí kunnu vit ikki bara lata útlendingar, sum ikki kenna føroysku veðurviðurskiftini, fara sjálvar út í náttúruna.

– Í fjør doyðu tvey ferðafólk í føroysku fjøllunum, og í fyrrárið doyðu tvey. Tað hevur eisini fleiri ferðir verið leitað eftir ferðafólki í føroysku fjøllunum. Tað er ikki vandaleyst at ferðast her, sigur Pól Sundskarð.  

Hann vísir á, at fleiri av teimum, sum hann hevur verið ferðaleiðari hjá, eisini vísa á vandan við at ferðast í føroyskum fjøllunum.

– Nógvir av mínum kundum hava ferðast kring allan heim. Fleiri hava verið í meira enn 200 londum og gingið og upplivað náttúruna. Tey hava sagt mær, at nakað av tí, sum er serstakliga vandamikið við at ganga í Føroyum, er veðrið, sum kann broytast rættiliga skjótt. Vit siga jú, at vit kunnu uppliva allar fýra árstíðirnar sama dag. Tey biða okkum eisini um at ansa eftir náttúruni og gera avmarkingar, so at hon ikki slítist upp, sigur Pól Sundskarð.

 

Verja náttúruna

Klaksvíkingurin, sum elskar at ganga í føroysku náttúruni, hevur nakrar ferðir vent sær til Visit Faroe Islands og heitt á tey um at hugsa um náttúruna í marknaðarføringini og at fáa skipa ferðavinnuna í føroysku náttúruni.

– Tey halda møguliga, at eg havi verið í so neiligur. Men eg geri hetta bara, tí eg vil verja føroysku náttúruna, samstundis sum eg ynski, at fleiri fáa góðar upplivingar í føroysku náttúruni undir skipaðum viðurskiftum – eisini okkara eftirkomarar, sigur Pól Sundskarð.

Jarðareigarar mugu geva seg

Hann vísir á, at festarar og eigarar av føroysku høgunum eisini mugu geva seg.

– Jarðareigarar mugu eisini geva seg. Tað er týðandi, at teir vilja samstarva og virka gjøgnum Jarðir og ikki bara hvør sær. Visit Faroe Islands hevur fleiri ferðir sagt, at tað eru 440 hagapartar í landinum, og at tað ber ikki til at samráðast við so nógvar partar. Nú er at standa saman sum eitt felag hjá Jarðum, sigur Pól Sundskarð.

Sjálvur dámar honum ikki tað, sum onkur bóndi hevur gjørt, at seta portur upp, ella krevja pengar frá ferðafólki, uttan at tey fáa eina tænastu afturfyri.

– Um fólk skulu rinda fyri at sleppa út í náttúruna, so skulu tey fáa eina tænastu afturfyri. Tað ber ikki til at rinda, og so einki fáa afturfyri, sigur hann.

Føroyingar skulu ganga ókeypis

Pól Sundskarð heldur, at munur kann gerast á føroyingum og útlendingum, tá ið tað ræður um at ganga í føroysku náttúruni.

– Føroyingar skulu sjálvandi sleppa at ganga ókeypis í føroysku náttúruni. Hetta er okkara land, og sjálvandi skulu vit hava rætt at fara í hagan ella fara upp á ein fjallatind. Men vit skulu eisini fara væl um, og ikki fara í hagan í fjalltíð, harutíð ella á annan hátt órógva.

Hann gleðist eisini um, at nógvir føroyingar hava verið í føroysku náttúruni seinastu vikurnar.

– Eg gleðist um, at síðani korona kom, hava føroyingar tikið náttúruna til sín. Tað er ein sólskinssøga. Eg havi ongantíð áður sæð so nógvar føroyingar í fjøllunum. Tað er sera hugaligt at síggja, sigur Pól Sundskarð.

Pól Sundskarð á einum av mongum fjallatoppunum í landinum

Pól Sundskarð saman við ferðafólki í Mykineshólmi (Mynd: pol.fo)